قبل يومين رحت للإتصالات السعودية بهدف: تغيير الشريحة بشريحة تدعم الجيل الثالث..
"وش بغيت يالحبيب؟" الموظف سائلاً! (الظاهر أني بسوق خضرة مو بشركة محترمة.. طيب ع الأقل سلم؟ أسال عن يومي.. اممم خلينا نحسن الظن ونقول إنه ممكن يبي يكون عملي وينجز عمله بسرعة ( p:
رديت: "والله ابي شريحة تدعم الجيل الثالث"
" الجوال باسم مين؟ "
" باسم الوالد وهذي بطاقة أحوالي.. تثبت أني ولده "
" والله يالحبيب.. آسفين .. لازم يحضر الوالد شخصياً أو ع الأقل تجيب بطاقة أحواله.. هذا هو النظام "
(( النظام!! الكلمة المُحببة لكل موظفي بلدة.. ما يفرق قطاع خاص أو حكومي.. النظام هي الكلمة الي يلجأ لها الكل.. المُضحك.. إن كثرة سماعك للكلمة هذي.. تظن إن البلد مُحكم بنظام صارم.. محترم من الجميع.. فتضطر إنك تقدره.. وما إنك تخرج من المكان حتى ترى إن النظام يوطاه كل شخص.. وإن الأصل هو كسر النظام!!))
(( الأنظمة الغبية!! وهذا موضوع أخر.. أحياناً تطلب منك حاجات مالها أي داعي.. مجرد تعقيد.. ما تحتاج تفكير.. أنا ما طلبت إلغاء رقم.. إلغاء خدمة.. أو إي حاجة فيها ضرر لصاحب الجوال الأصلي.. الشريحة الي معاي أبي بدل منها شريحة أخرى أكثر تطوراً.. لا فلوس مطلوبة ولا حاجة.. ليه التعقيد هذا؟ وإلا خلاص هي صارت حاجة أساسية.. تطلب أي خدمة بدون تفريق.. لازم نفس الشروط حتى لو ما كانت تحتاج الصلاحيات اللازمة !!
موقف أخر مع الأنظمة الغبية.. كلمت البنك الأهلي وأنا خارج السعودية أطلب رقم الآيبان بحيث أني أستطيع تحويل الفلوس لحسابي.. قال أخونا.. استخدم التلفون البنكي.. قلت والله ما فعلته.. قال أجل أسف ما أقدر أخدمك! .. هيه يبو الشباب.. وش ما أقدر أخدمك؟ أبي رقم الأيبان.. هذا طلب ما يحتاج صلاحية.. أنا ما أطلب تحويل مالي.. أو تغيير عنوان.. أو أي حاجة مضرة.. بالعكس صاحب الآيبان حتى لو ما كان أنا .. صاحب الحساب بيستفيد.. بتجيه فلوس.. :) لكن الكلمة الرنانة تقابلني من جديد"هذا هو النظام!!".. فقلت له: أنت ما تقدر.. ما عندك صلاحية.. عطني مديرك.. وأنت أطلع منها.. المهم قال لي: لحظات شوي.. ورجع لي.. وقال تفضل أخوي: هذا هو الرقم.. وهذا موضوع ثاني ينرفز!! يعني لازم نطلب المدير.. عشان تنحل مشاكلنا؟ لازم نعصب؟ لازم نصير غابة؟ يعني المحترم مكتوب له إنه ما يتسوى له شيء؟.. ما تلاحظون واجد المواضيع الي تنرفزني :\ ))
المهم نرجع لموضوعنا الأصلي... قبل ما أروح وأطق المشوار.. قلت خلينا نكلمهم ونتأكد من الأنظمة!! وقالوا: يكفي تجيب بطاقة أحواله.. أمنا بالله ورحنا.. وجلست أنتظر دوري.. ولما باقي رقم يجي موعد خدمتي.. دخل أحد الأخوان.. واتجه مباشرة لأحد الموظفين.. وسلم عليه.. كأن بينهم معرفة.. وقعده قريب منه.. ولما انتهى من خدمة العميل.. المفترض إنه يضغط الزر عشان يجي رقمي.. لكن هذا الأخ الي توه داخل.. راح وبدأ الموظف يخدمه! (( يبو الشباب.. هيه في بشر هنا تنتظر... !!! )) الصراحة فكرت: أني أروح للموظف وأقول له: أنا الحين أحس بغبنة لأنك قدمت الأخ علي.. فـ هل هو فعلاً مقدم علي؟ لأنك تعرفه؟ وإلا هو جاء من قبل وأنا فاهم غلط.. عشان ما نسيء الظن!! ولكن الفكرة بقت فكرة...
أخيراً.. وبكل ثقة تقدمت للموظف.. وعطيته كل المطلوب عشان أبدل الشريحة.. ولكن يأبى النظام إلا إنه يلقى له مخرج.. ويقول: "والله النظام يقول إن صاحب الجوال لازم يحضر شخصياً".. طيب يالحبيب قالوا لي بالتلفون إنه البطاقة تكفي.. ولكن بكل بساطة قال: "غلطان.. النظام لازم يحضر" (( وهذي مشكلة ثانية على فكرة.. إن النظام إلي كلن يتكلم عنه.. مو نظام واحد.. كل واحد عنده نظام على كيفه.. ع المزاج!!! " بديت أشرح له وقلت: يابن الحلال.. صعبة الوالد يجي.. يأخي أفرض إنه مسافر شهر.. انتظر؟ طيب أكلمه لك؟ مافي فائدة... النهاية المعتادة: "وين المدير؟"...
ويجيك المدير الي يطالعك من طرف خشمه.. كأنك تشحذ يا شيخ.. مو عميل عندهم.. وأشرح له الموقف.. قال: إيه لازم يحضر الوالد.. قلت ما يقدر.. وش الحل؟ بعد شد وجذب.. قال: "بأفزع لك عشان رمضان.. علشانك بس" (( لا يا شييخ.. بيمن علي بعد!! لازم تنذل.. مافي شيء يجيب برحابة صدر.. وبهدوء.. لازم تحس إن الشيء يجيك بطلعة الروح... ))
النقطة الجديرة بالملاحظة.. إن هذي """ شركة """ وأنا """ عميل """ يعني يفترض إنها تحاول تحافظ على عملائها بقدر الإمكان.. أنا أدفع مبلغ وقدره.. عشان أحصل على خدمة معينة.. لا تعليق.
يحتاج نتكلم عن الدوائر الحكومة؟ الي يعطونك خدمة لأنك مجرد مواطن تستحق الخدمة وما راح تدفع لهم شيء.. يعني باختصار ما تفرق معهم إنك جيت تأخذ الخدمة أو لا.. لأنه باختصار ما يفرق!!! ... أتوقع ما يحتاج :)
